Bajer Leverkuzen je u finalu Lige Evrope, nakon što se još jednom vratio iz mrtvih.

Nije gotovo! Traje bajka Ćabi Alonsa i Bajer Leverkuzena od 27. maja 2023. godine! Naređali su 48 mečeva bez poraza, a kada je sudija iz Holandije Dani Makeli u 43. i 66. minutu sudio penale za Romu djelovalo je da je kraj! Leandro Paredes je dao gola iz ovih penala, Roma je povela sa 2:0, a Mile Svilar je sa 12 odbrana čuvao gol svog tima. Ipak, ne umire ovaj tim nikako! 

Prvo je Manćini postigao autogol, a onda je Josip Stanišić izjednačio u 97. minutu. Nakon jednog kornera štoper Rome je ubacio loptu u svoju mrežu, a zatim je hrvatski bek na pozajmici iz Bajerna u samom finišu u posljednjem napadu meča još jednom vratio svoj tim iz mrtvih, postigao gol za 2:2 i nastavak niza!

Uspio je tim iz Njemačke da nastavi svoj nevjerovatan niz! Do kraja sezone imaju još mečeve sa Bohumom i Augzburgom u Bundesligi i finala kupa Njemačke protiv drugoligaša Kajzerslauterna, kao i finale lige Evrope sa Atalantom. Ovo su najduži nizovi bez poraza u istoriji evropskog fudbala, s tim što niz Bajera može da se nastavi! 

• 49 utakmica - Bajer (2023-24)
• 48 - Benfika (1963-65)
• 45 - Dinamo Zagreb (2014-15)
• 45 - Rijeka (2016-17)
• 45 - Rendžers (1992-93)
• 43 - Juventus (2011-12)
• 42 - Milan (1991-92)
• 42 - Ajaks (1995-96)
• 41- Nju Sejnts (2023-24)
• 40 - Fiorentina (1955-56)...

U drugom polufinalu Lige Evrope Atalanta je poslije 1:1 u prvom meču u Marseju bila bolja od Olimpika sa 3:0 na svom terenu i tako je bukirala mjesto u finalu. Prvo je Ademola Lukman pogodio poslije pola sata igre na asistenciju Šarla De Ketelara, a onda je i Ruđeri iskoristio asistenciju stelca prvog gola za 2:0 i prolazak u veliko finale.